看过琼瑶阿姨的“还珠格格”之后，想想里厢头的一个格格演得就是上海闲话“鲜格格”格生活版。

　　鲜格格迪句闲话是阿拉上海人格口头语，常常听得到格，么放“还珠格格”前，大家有各种各样的说法，不同的场合鲜格格是勿一样格。“还珠格格”一红，交关小姑娘做了格格格粉丝，想做格格的人还蛮多格，伊拉想当然以为格格是公主格代名词，其实伊拉勿想到上海闲话还有“鲜格格”迪格口头语。

　　鲜格格可以理解为不怕难为情，也可以理解为不要脸，就看用在什么地方了。

　　小姑娘谈了个男朋友，么多少辰光，男朋友要跟伊分手，小姑娘煞唔拉打电话发短信老想跟伊谈下去，为啥？小姑娘是初恋，老欢喜伊，伊勿晓得迪格男小囡是格情场老手，对小姑娘一眼眼唔兴趣，小姑娘爷娘晓得之后，劝伊勿要再谈下去了。“侬格宁鲜格格，就是伊跟侬好，将来还是要吃苦头格。”鲜格格迪种辰光是一厢情愿格意思。

　　老公来了公司上班，老婆隔眼辰光就打电话把伊，有闲话无闲话跟老公讲几句，“侬伽鲜格格做啥，夜里又勿是勿回去格。”迪格辰光鲜格格表面是关心老公，内心里厢是跟踪老公，有点勿放心老公，鲜格格有眼吃醋格味道。

　　老板格女秘书常常代替老板发号施令，弄得来比老板还要老板格腔调，鲜格格还要到处指手画脚，老勿适宜格，迪天老板娘气势汹汹到了办公室，让小秘书马上滚出去。老板问伊为啥，老板娘就一句闲话“伊太鲜格格了”。

　　鲜格格勿是“还珠格格”，交关辰光鲜格格是蛮难区别好跟坏，有种辰光鲜格格是勿要面孔格意思，有种辰光鲜格格是有眼讨人欢喜格意思，别过生活中鲜格格样子还是少眼好。