老同学自以为到国外镀过金，学过所谓格标准英格里西。回到上海跟大家聚会，谈谈白相相，伊动勿动就弄几句阿拉听勿清格外国口语，阿拉实在屏勿老就问伊：侬到底想讲啥么子，弄得一息息上海闲话，一息息弄几句洋泾浜格英格里死，侬以为侬讲格外国闲话老标准是伐，人家老克勒英文八级，现在是领事馆的翻译，还么像侬中勿中、洋勿洋，侬晓得洋泾浜是啥格意思伐？

　　老同学迪只面孔红了起来，讲了难听点闲话，大家晓得伊出国读书是假格，扒分是真格，外国闲话听得懂还可以，真格要伊写出来翻译肯定是勿来三，是典型格洋泾浜。

　　洋泾浜，老早阿拉上海格一条河浜，由于当时租界的原因，河南河北各种各样格洋人讲各种洋话，弄得上海人学还学勿像。好比老早交关省市人到上海工作、读书，要学习上海话一样，一息息讲自己地方方言，一息息本地话，大家一致公认迪格就是洋泾浜闲话。

　　现在有交关外国人，外省市人到上海，住在各个上海格小区里，为了融入上海学讲上海闲话，刚刚开始学就有眼眼洋泾浜，还会弄出交关笑话。所以为了让大家学会上海闲话，出版了交关上海闲话格书，交关人学了老起劲格，就是勿想让别人讲是洋泾浜。

　　刚刚开始学讲上海闲话，一定会洋腔百出，勿要紧格，只要慢慢学总归会学得像格。勿相信侬看看上海电视台有几个外国人讲上海闲话讲了勿要太好噢，还是嘉宾主持。

　　会几句洋泾浜闲话勿是坏事体，现在阿拉国家阿拉上海对外开放，要跟人家外国人交流交流嘎嘎三糊，勿会一眼洋泾浜哪能来四。奥运会、世博会在中国开，会一眼眼洋泾浜闲话，勿管侬会的讲日语、英语、韩语，总之到辰光可以跟人家外国人交流交流，就是洋泾浜也么啥关系。