上海人屋里厢格老人常常会把“做人家点”挂在嘴边，动勿动或者看不惯屋里厢小囡浪费，就来一句“侬做人家点好伐”。

　　做人家往往被勿晓得上海生活格朋友，误认为是上海人家小气格代名。即使在外看上去是个“大户”，穿得是山青水绿的，吃饭请客买单抢在前面派头还蛮大，可是伊拉回到屋里厢还是交关“做人家”格，一分洋钿掰两半用。这恰恰是上海人理性理财的优点。他们主张自力更生，爷有娘有勿如自有，家子婆有还要房门口守一守，伊拉绝对是不会戆嗨嗨去掼么用格派头。

　　做人，做把人家看，就是在外面要有腔调，到了屋里就是要节约，做人家大概就是迪格意思。看看现在格年轻人吃饭动勿动就到饭店里去消费，买衣裳鞋子化妆品动勿动就是几百元、几千元甚至于几万元，买回来又勿穿勿用，屋里厢摆了交交关，真是作孽。明明屋里厢爷娘把饭菜烧好了，伊拉就是勿肯回来吃，在外面耍派头。看上去工资蛮高可是依拉格工资赚来还勿够用，还要揩爷娘一眼眼格劳保钞票。劝依拉“省点钞票将来成家要用格，要学会做人家点”。

　　“阿拉是来拉做人家，穿名牌，请朋友吃饭，就是为了做人家，侬让我穿得破破烂烂，又不请人家朋友吃饭，人家勿要被人家看不起格，侬晓得伐，做人家，做人家就是做把人家看格，勿然闲话面子还么了，侬讲对伐？”想想现在格小囡讲的还有些道理，过去为了做人家就是想节省为了下一代，人人晓得格一句“冬天吃咸菜，夏天吃瓜皮，难板难板咸菜炒肉丝”，虽然讲的是物资匮乏东西少，但是也可以想象上海人为了做人家的那种生活态度。

　　现在勿晓得迪格“做人家”到底哪能来解释。房子买的是越来越大，既做给人家看了，又作为一种投资，银行里的贷款什么时候能还清只有自己知道，家里的车子是换得越来越豪华，还是为了做人家平时大多数是停在停车场，汽油费涨价涨得实在受不了，电视机的尺寸也是越来越大，真正看的时间不知道有多少。做人家做得实在是太累了。