小辰光，大人常常带阿拉跟伊一道出去白相，伊到啥地方阿拉跟到啥地方，看到阿拉跟了大人后头，交关人讲阿拉像只“跟屁虫”。阿拉人小还以为真格有迪种虫叫“跟屁虫”，还要让大人去抓两只来白相，等到阿拉长大读书之后，常常跟在老师后头，其他同学背地里也讲阿拉像只“跟屁虫”，才晓得“跟屁虫”就是跟了人家后头往东往西，自己么主张格意思。想想自己小辰光不懂事体胆子小，要跟在大人后头勿大会落特。读书辰光想跟在老师后头随时随地能听到老师讲啥么子，想做一个好学生，有交关同学想做跟屁虫还做勿着来。

　　上班之后跟师傅跟了紧是想多学习点技术，要晓得多学技术就多拿一眼奖金，又有啥勿好，跟我一同进厂格同学三天打鱼两天晒网，到了考试格辰光考勿出，工资么加，回到屋里厢爷娘骂三门，骂得伊一眼面子还么，后叟来伊暗暗交跟了老师傅后头，也做了只跟屁虫，迪只跟屁虫跟了到底哪能，还是要到考试之后才晓得。

　　再大一点要谈女朋友，除了上班么辰光，平常只要有辰光就想办法，动脑筋跟着伊一到白相，看电影，交关朋友讲我是重色轻友，做了人家小姑娘格跟屁虫，我勿大好意思讲伊拉，伊拉现在么谈朋友，老里白早勿是讲谈朋友是讲谈靠定，靠定就是男女朋友格意思，伊拉有靠定朋友格闲话，肯定比阿拉跟了还要紧。做跟屁虫跟了紧一点，是为了追到人家靠靠定，等到之结婚跟屁虫基本上去冬眠了，现在想想当时做格种“跟屁虫”还是蛮有咪道蛮有劲格。有了跟屁虫跟老伊才会的有今朝，有辰光伊讲为啥要做跟屁虫，回答伊讲是一种关心，么格种关心格种跟屁虫，哪能有今朝格家庭幸福呢。

　　虽然现在男女之间谈朋友，结婚后双双对对已经勿晓得啥人在做“跟屁虫”，侬只要有心看一看，随便伊拉男女单独跟大家一道白相，到了辰光“跟屁虫”就会跟了过来。“喂，我现在跟某某人一道谈工作……”“我已经到车子上，现在马路比较堵车，再等一息就到屋里了。”“今朝加班晚点到家。”看到伊拉手里厢格手机讲格些闲话，对方人虽然么跟过来，手机格只“跟屁虫”时时刻刻跟牢侬。除非电池板没电，或者不在服务区。

　　老早用BB机别了身上做“跟屁虫”，BB声音一响，身边么电话，勿想回伊可以不回，所以跟了勿太紧。现在手机是全球通，上头还有千里眼格视频，跟得侬来得格紧，格只“跟屁虫”想掼还掼勿特，除非侬勿想要跟屁虫，那就勿好用手机，想想现在要掼特迪只跟屁虫还蛮难。